2Ki 24 | NdeIBE | STEP | Ngezinsuku zokubusa kukaJehoyakhimi uNebhukhadinezari walihlasela ilizwe uJehoyakhimi wathela kuye okweminyaka emithathu. Kodwa waphinda waguquka wamvukela uNebhukhadinezari.

2 Kings 24

1 Ngezinsuku zokubusa kukaJehoyakhimi uNebhukhadinezari walihlasela ilizwe uJehoyakhimi wathela kuye okweminyaka emithathu. Kodwa waphinda waguquka wamvukela uNebhukhadinezari. 2 UJehova wathuma abahlaseli bamaBhabhiloni lama-Aramu lamaMowabi, lama-Amoni, amhlasela. Wabathuma ukuchitha uJuda njengelizwi likaJehova alikhuluma ngezinceku zakhe abaphrofethi. 3 Ngempela konke lokho kwenzeka koJuda mayelana lomlayo kaJehova ukuze basuswe phambi kwakhe ngenxa yazo zonke izono zikaManase azenzayo, 4 langenxa yegazi elachithekayo lingelacala. Ngokuba wayegcwalise iJerusalema ngegazi elingelacala njalo uJehova wayengazimiselanga ukuthethelela.

5 Ezinye izehlakalo zembali kaJehoyakhimi azilotshwanga yini egwalweni lwembali yamakhosi akoJuda na? 6 Wafa uJehoyakhimi waya ekuphumuleni kubokhokho bakhe. UJehoyakhini indodana yakhe yathatha ubukhosi.

7 Inkosi yaseGibhithe ayizanga ihlasele futhi iphuma elizweni layo, ngenxa yokuthi inkosi yaseBhabhiloni yayisithethe ingxenye yelizwe layo enkulu kakhulu, kusukela eSihotsheni seGibhithe kuze kuyefika eMfuleni uYuFrathe.

UJehoyakhini iNkosi YakoJuda

8 UJehoyakhini wayeleminyaka elitshumi laficamibili esiba yinkosi, njalo wabusa eJerusalema okwezinyanga ezintathu. Ibizo likanina lalinguNehushita indodakazi ka-Elinathani; evela eJerusalema. 9 Wenza ububi phambi kukaJehova, njengalokhu okwakwenziwe nguyise.

10 Ngalesosikhathi amabutho kaNebhukhadinezari inkosi yaseBhabhiloni afika eJerusalema, awuvimbezela umuzi, 11 uNebhukhadinezari yena ngokwakhe wazafika amabutho akhe esewuvimbezele umuzi.

12 UJehoyakhini inkosi yakoJuda wazinikela enkosini yaseBhabhiloni, yena lonina lezinceku zakhe labathenwa bakhe. Ngomnyaka wesificamibili wokubusa kwenkosi yaseBhabhiloni uNebhukhadinezari wathumba uJehoyakhini. 13 Njengelizwi likaJehova, uNebhukhadinezari wabutha yonke inotho yasethempelini likaJehova lenotho yesigodlo senkosi, wabutha zonke izitsha zegolide ezazisethempelini likaJehova, ezazenziwe nguSolomoni inkosi yako-Israyeli, njengokutsho kukaJehova. 14 Wathumba abaseJerusalema bonke: izikhulu zonke, lawo wonke amadoda empi lazo zonke izingcitshi ezileminwe, abantu abayizinkulungwane ezilitshumi. Kwasala abantukazana kuphela elizweni.

15 UNebhukhadinezari wamthatha uJehoyakhini wayamgqilaza eBhabhiloni. Wathumba njalo eJerusalema unina wenkosi labafazi bayo lezikhulu zayo lamadoda aziwayo elizweni.

16 Inkosi yaseBhabhiloni yathumbela eBhabhiloni wonke amadoda angamaqhawe, ayizinkulungwane eziyisikhombisa, aqinileyo ayengaphuma impi, kanye lezingcitshi ezileminwe eziyinkulungwane. 17 Inkosi yaseBhabhiloni yabeka uMathaniya uyise omncinyane kaJehoyakhini waba yinkosi esikhundleni sikaJehoyakhini, yasimupha ibizo elitsha lokuthi nguZedekhiya.

UZedekhiya iNkosi YakoJuda

18 UZedekhiya wayeleminyaka engamatshumi amabili lanye ebekwa ukuba yinkosi, wabusa eJerusalema okweminyaka elitshumi lanye. Ibizo likanina lalinguHamuthali indodakazi kaJeremiya, evela eLibhina.

19 Wenza okubi phambi kukaJehova, njengokwakwenziwe nguJehoyakhini. 20 Kwakungenxa yokuthukuthela kukaJehova ukuze kwenzakale konke lokhu eJerusalema lakoJuda, okwabangela ukuthi uJehova abachithe.

Ukuwa KweJerusalema

UZedekhiya wayihlamukela inkosi yaseBhabhiloni.